Беларуская незалежная кінаакадэмія патрабуе вызваліць з сербскай турмы рэжысёра і актывіста Андрэя Гнёта і не экстрадаваць яго ў Беларусь. Там яму пагражае зняволенне, катаванні і нават смяротнае пакаранне.

Андрэй Гнёт вядомы тым, што здымаў дакументальную хроніку падчас пратэстаў 2020 года ў Беларусі і запісваў заклікі спартоўцаў да свабодных і справядлівых выбараў. За гэтыя дзеянні ён пераследуецца беларускім рэжымам. Андрэя арыштавалі ў Сербіі, бо Інтэрпол задаволіў запыт беларускіх уладаў на яго вышук. Пазней Інтэрпол адмяніў запыт на вышук, аднак Сербія не вызваліла Андрэя, і небяспека ў тым, што ён можа быць экстрадаваны ў любы момант.

Андрэй Гнёт прызнаны міжнароднымі праваабарончымі арганізацыямі палітычным вязнем.

Гадамі беларускі рэжым працягвае пераследаваць актыўных грамадзян пасля сфальсіфікаваных прэзідэнцкіх выбараў у 2020 годзе, каб знішчыць любыя праявы іншадумства. У Беларусі няспынна працягваюцца ператрусы, арышты і катаванні.

Ніякая цывілізаваная краіна ці міжнародная арганізацыя не супрацоўнічае з Беларуссю ў пошуку і экстрадыцыі палітычна актыўных уцекачоў.

 Мы заклікаем міжнародныя арганізацыі і праваабарончыя групы звярнуцца да ўладаў Сербіі з просьбай не дапусціць экстрадыцыі Андрэя Гнёта ў Беларусь і дамагчыся яго неадкладнага вызвалення. Час мае важнае значэнне, мы павінны дзейнічаць зараз, каб выратаваць Андрэя Гнёта.