Дэкларацыя аб стварэнні Беларускай Незалежнай Кінаакадэміі
Мы, беларускія кінематаграфісты, заяўляем пра стварэнне Беларускай незалежнай кінаакадэміі.
Ва ўмовах грамадска-палітычнага крызісу і крызісу правоў чалавека, якія разгарнуліся ў нашай краіне, мы не хочам заставацца маўклівымі назіральнікамі злачынстваў уладаў Беларусі.
Рэжым не толькі пераследуе палітычных апанентаў, удзельнікаў мірных пратэстаў і ўсіх, хто якім-кольвек чынам выказвае сваю з ім нязгоду. Ён таксама знішчае незалежныя арганізацыі ды грамадскія ініцыятывы. Сярод зліквідаваных уладамі аб’яднанняў – і скіраваныя на падтрыманне ды развіццё беларускай культуры, а значыць, і кіно. Адначасова рэжым робіць усё больш адкрытыя захады для знішчэння беларускай мовы і замяшчэння яе расейскаю.
У выніку беларускія кінематаграфісты вымушаныя з’язджаць з краіны. Частка з іх уцякае праз пераслед, рызыку трапіць у турму і зазнаць катаванні. Але шмат хто з творцаў з’язджае і праз тое, што ў краіне больш не засталося незалежнай культуры, а незалежнае аўтарскае выказванне сталася немагчымым.
Гэтак сама, як вайною ўладаў Беларусі супраць уласнага народу, мы абураныя іх суўдзелам у сапраўднай вайне Расеі супраць Украіны. Беларуская незалежная кінаакадэмія падтрымлівае Украіну ды ўкраінскі народ у барацьбе за свабоду і супраць расейскай акупацыі. У лютым 2022 года беларуская кінасупольнасць публічна выступіла супраць расейскай ваеннай агрэсіі ў дачыненні Украіны: заяву з асуджэннем дзеянняў Расеі падпісалі больш за 130 беларускіх кінематаграфістаў.
Мы лічым злачынную ўладу Беларусі нелегітымнай, а значыць, не надзеленаю правам рэпрэзентаваць беларускі народ і дзеяць ад імя беларусаў – у тым ліку ў кіно. Менавіта таму мы яднаемся, каб голасам беларускай кінасупольнасці былі незалежныя кінематаграфісты. Нашая прынцыповая пазіцыя – адмова ад супрацы з дзяржаўнымі структурамі. Мы лічым непрымальным пры сённяшняй уладзе ў Беларусі ствараць кіно за дзяржаўны кошт і тым самым спрыяць ідэалогіі таталітарнай дзяржавы. Але мы падтрымліваем фільммэйкераў, якія застаюцца ў краіне і працягваюць працу ў незалежным кінематографе нават пад ціскам страху пераследу.
Нашы мэты:
Аб’яднаць незалежных беларускіх кінематаграфістаў і зрабіць іхны голас больш чутным і заўважным у свеце.
Распаўсюджваць інфармацыю пра дзейнасць беларускіх кінематаграфістаў, а таксама пра грамадска-палітычны крызіс у Беларусі і крызіс, у якім аказалася незалежнае беларускае кіно.
Спрыяць інтэграцыі незалежнага беларускага кінематографу ў агульную еўрапейскую кінасупольнасць паводле каштоўнасцяў, магчымасцяў і перспектываў развіцця ды наладжванню супрацы беларускіх кінематаграфістаў з міжнароднымі кінаінстытутамі, кінафондамі, кінарынкамі.
Супрацьстаяць цэнзурным абмежаванням і забаронам – адстойваць мастацкую свабоду і права аўтара на адлюстраванне разнастайных з’яваў нашага свету.
Спрыяць магчымасцям асветы і адукацыі беларусаў у галіне кіно.
Спрыяць атрыманню беларускімі кінематаграфістамі міжнароднага фінансавання.
Лабіяваць інтарэсы беларускага незалежнага кінематографу на міжнародных пляцоўках.
Мы мяркуем, што дасягненне гэтых мэтаў паспрыяе развіццю беларускага кіно, а значыць, прывядзе да лепшага знаёмства міжнароднай супольнасці як з кіно, так і з каштоўнасцямі беларускага грамадства. Усё гэта мае дапамагчы сфармаваць дэмакратычныя прынцыпы, на падставе якіх будзе збудаваная праца беларускай кінаіндустрыі пасля здабыцця Беларуссю незалежнасці ад таталітарнага рэжыму. Дзейнасць Кінаакадэміі адлюстроўвае інтарэсы беларускага грамадства, скіраванага да дэмакратычных пераўтварэнняў.
