Беларуская незалежная кінаакадэмія (BIFA) падпісала ў Люксембурзе дакумент аб заснаванні Федэрацыі кінаакадэміяў Еўропы (FACE). BIFA афіцыйна рэпрэзентуе Беларусь у Федэрацыі і ёсць адным з 21-го сябра-заснавальніка новай агульнаеўрапейскай арганізацыі. Сярод іншых арганізацыяў-заснавальніц – Еўрапейская кінаакадэмія, Дацкая кінаакадэмія, Кінаакадэмія Люксембургу, Аўстрыйская кінаакадэмія, Украінская кінаакадэмія і іншыя. Пасля падпісання дакументу больш краін звярнуліся ў FACE з просьбай аб уступленні.
Мэта Федэрацыі кінаакадэміяў Еўропы (FACE) – фармалізаваць адносіны паміж кінаакадэміямі, аб’яднацца для прадстаўлення агульных інтарэсаў і супрацы, падвысіць бачнасць еўрапейскага кіно.
«Як сетка кінаакадэміяў, мы выраслі за апошнія 18 гадоў. Усё больш і больш, і асабліва пасля пандэміі COVID, мы становімся сведкамі таго, як шмат у нас агульнага і наколькі карысна для ўсіх нас абменьвацца досведам і аб'ядноўваць намаганні, – кажа Матэяш Вутэр Кноль, сябра кіраўніцтва новай федэрацыі і генеральны дырэктар Еўрапейскай кінаакадэміі. – Захапляльна пачаць гэты новы раздзел стварэннем Федэрацыі. Ажыўленне супрацы ў Еўропе вельмі важна ў час, калі актуальнасць культурнай палітыкі і падтрыманне еўрапейскага кіно ставяцца пад адкрыты сумнеў».
Ян Тонар, прэзідэнт Люксембургскай кінаакадэміі і старшыня кіраўніцтва Федэрацыі, заяўляе: «Федэрацыя – гэта кола культурнай салідарнасці, якое цягнецца па ўсім кантыненце, аб'ядноўваючы нашыя разнастайныя і ўнікальныя галасы ў кіно, каб іх можна было пачуць і ўбачыць усюды, дзе гэта неабходна. Люксембург мае гонар быць базай гэтай натхняльнай новай Федэрацыі».
Пад эгідай новай Федэрацыі еўрапейскія кінаакадэміі будуць разам прэзентаваць свае агульныя інтарэсы і аб'ядноўваць спектр працы, якую яны выконваюць для розных галінаў кінаіндустрыі. Важнай часткай працы Федэрацыі будзе лабіяванне з еўрапейскімі і нацыянальнымі палітыкамі, каб гарантаваць, што еўрапейскае кіно па-ранейшаму разглядаецца як важная культурная каштоўнасць і як істотны эканамічны фактар. Таксама важнымі аспектамі стануць кінаадукацыя, пашырэнне сяброўства і праекты кінаспадчыны, у якіх устойлівасць, разнастайнасць і залучанасць ёсць ключавымі элементамі. Федэрацыя хоча, каб праца кінаакадэміяў лічылася неадымнай часткай любой еўрапейскай палітыкі ў галіне кіно. Агулам новая федэрацыя аб'ядноўвае каля 20 тысяч чалавек.
Новая структура дазволіць акадэміям супольныя і больш узгодненыя дзеянні на еўрапейскай і міжнароднай арэне.
«BIFA атрымала запрашэнне Еўрапейскай кінаакадэміі і Люксембургскай кінаакадэміі ўвайсці ў склад устаноўчай рады Федэрацыі, – кажа сузаснавальніца BIFA і сябра кіраўніцтва Воля Чайкоўская, якая падпісвала дакумент ад імя Беларускай незалежнай кінаакадэміі, – Падпісанне дакументу Беларускай незалежнай кінаакадэміяй – гэта вялікі крок наперад у прызнанні беларускага незалежнага кіно ў Еўропе, а таксама пашырэнне магчымасцяў для развіцця беларускіх кінематаграфістаў у выгнанні».
СЯБРЫ-ЗАСНАВАЛЬНІКІ ФЕДЭРАЦЫІ
- Аўстрыя: Akademie des Österreichischen Films (Austrian Film Academy)
- Беларусь: Беларуская незалежная кiнаакадэмiя (Belarusian Independent Film Academy)
- Бельгія: Académie André Delvaux (André Delvaux Academy)
- Каталонія: Acadèmia del Cinema Català (Catalan Film Academy)
- Чэхія: Česká filmová a televizní akademie (Czech Film and Television Academy)
- Данія: Danmarks Film Akademi (Danish Film Academy)
- Еўрапейская кінаакадэмія
- Нямеччына: Deutsche Filmakademie (German Film Academy)
- Грэцыя: Ελληνική Ακαδημία Κινηματογράφου (Hellenic Film Academy)
- Ісландыя: Íslenska kvikmynda- og sjónvarpsakademían (Icelandic Film and Television Academy)
- Ізраіль: האקדמיה הישראלית לקולנוע וטלוויזיה (Israel Academy of Film and Television)
- Італія: Accademia del Cinema Italiano (Italian Academy of Cinema)
- Люксембург: d'Filmakademie (Luxembourg Film Academy)
- Нідэрланды: DAFF (Dutch Academy for Film)
- Нарвегія: Norsk Filmforbund (Norwegian Film Academy)
- Польшча: Polska Akademia Filmowa (Polish Film Academy)
- Партугалія: Academia Portuguesa de Cinema (Portuguese Academy of Cinema)
- Славаччына: Slovenská filmová a televízna akadémia (Slovak Film and Television Academy)
- Іспанія: Academia de las Artes y las Ciencias Cinematográficas de España (Spanish Academy of Cinematic Arts and Sciences)
- Швейцарыя: Schweizer Filmakademie / Académie du Cinéma Suisse / Accademia del Cinema Svizzero (Swiss Film Academy)
- Украіна: Українська Кіноакадемія (Ukrainian Film Academy)
